(Pisano e Falvo)
CANTA ORIGINAL: DIVERSOS CANTORES
Diceva 'a luna janca: "Oje mare, mare…
nun voglio fà cchiù luce quann'è 'a sera…
Mme dispiace pè sti marenare,
ma, a stu paese, nun ce vengo cchiù…
Ccà se spassano a fà 'ammore
quann'io sòngo chiara chiara…
E nun sanno
ca pur'io tengo nu core,
comm''o tiene pure tu…
Oje mare, mare…
a Napule sò' tutte 'nnammurate,
'e ffemmene sò' troppo appassiunate…
Mme ne vaco…
Accussì voglio vedè
comme fanno senz''e me…"
E rispunnette 'o mare: "Oje luna, luna…
chi, meglio 'e te, mme pò dà cchiù ragione?
Ma tu t''e gguarde sulo, pè furtuna,
mentr'io nun saccio cchiù che suppurtà…
Varchetelle a centenare…
Vase, lacreme, suspire…
E pò doppo,
siente 'e dicere: – È stu mare
ca peccato ce fa fà! –
Oje luna, luna…
a Napule sò' tutte 'nnammurate…
'e ffemmene sò' troppo appassiunate…
Mme ne vaco,
accussì voglio vedè
comme fanno senza 'e me!…"
Nu viecchio piscatore ca sentette
chistu trascurzo fatto dint''a notte,
"Tu nun capisce, oje luna, – lle dicette –
si te ne vaje che male ce può' fà!?…
Ccà se magna pane e ammore,
ccà se canta pè stu mare…
E si, overo,
tutt'e duje tenite core,
nun ce avit''a abbandunà!…"
'A luna e 'o mare,
sentenno stu pparlà doce e curtese,
dicettero: "Chi 'o lassa stu paese?
Và nce 'o ddice
ca restammo sempe ccà…
pè delizia 'e 'sta città!"