(Apicella)
CANTA ORIGINAL: DIVERSOS CANTORES
'A pacienza?! E che pacienza?!
Chesto è troppo, basta mo!
Sòngo stato sempe buono…
anzi, santo, mo nce vò'…
'A mesura s'è ghincuta!
Che ato mme vulite fà?
Pure 'a copp''o calannario
mme vulite cancellà!
San Gennaro, carta 'e tre…
faccio 'o 'nzisto…embè, che nc'è?
Mo nun mme dicite cchiù:
"San Gennà', pènzace tu!…"?!
Mm'aggio fatto appiccià 'e ccere
'nnanze, pure 'o mese 'e luglio…
Aggio fatto fermà 'a lava
ca scenneva comm'a ll'uoglio…
tutto 'nzieme nu decreto
ca mme dice: "Guè, Gennà',
te sì fatto troppo viecchio:
mo t'avimm''a penziunà!…"
E perciò, pè chist'affronto,
io mm'atteggio a carta 'e tre…
e si vene 'o terramoto
non contate su di me…
Và sapenno, appura e 'ntienne…
mo cunosco 'a verità:
'a nu santariello "Beat"
mm'hanno fatto rimpiazzà!
Quant'è vero ca mme chiammo
Gennarino, ll'aggì'a dà
quatto sciusce p''a fatica
ca se ll'ha da ricurdà!…
San Gennaro, carta 'e tre…
faccio 'o 'nzisto…embè che nc'è?
Stongo 'e casa dint''o Duomo
ma non sono più Patrono…
Cchiù miracule non faccio!
È fernuta 'a zezzenella:
Faccio correre 'a finanza
dint''o Bùvero e a Furcella!
Non proteggo più il grattino…
anze, mo 'o faccio piglià…
e denuncio le rapine
ca se stanno a organizzà!…
Tutto chesto pè dispietto
ca nun mme pregate cchiù…
E, alla prima epidemia,
mme ne vaco a Cefalù!
Nfrù, nfrù!
Più miracoli non faccio!
È fernuta 'a zezzenella:
Faccio correre 'a finanza
dint''o Bùvero e a Furcella…
Non proteggo più il grattino…
anze, mo 'o faccio piglià…
e denuncio le rapine
ca se stanno a organizzà!…
Per adesso cambio casa:
me ne vado abbascio 'o Puorto…
Pè miracolo, quest'anno,
scioglio 'o sango…'e chi v'è muorto!
