(Oliviero e Canzio)
CANTA ORIGINAL: DIVERSOS CANTORES
'A sera, 'ncopp''e viche,
cu 'a chitarra, scenne pe' Tulèto…
Tene 'a cravatta gialla
e na giacchetta cu 'a spaccata arreto…
'E scarpe a varchetella
e nu cazone fatto a zompafuosso…
e chi s'avota 'a ccá…
e chi s'avota 'a llá…
guardánnolo 'e passá…
'O chiámmano Giuvanne cu 'a chitarra…
pecché sape cantá tutt''e ccanzone.
E' stato 'nnammurato 'e na figliola
che ll'ha lassato miezo scumbinato…
E porta 'e sserenate a 'e 'nnammurate:
pe' ciento lire canta "Anema e core",
pe' cincuciento fa ll'americano:
s'arrangia a 'mpapucchiá "Johnny Guitar"…
'O chiámmano Giuvanne cu 'a chitarra…
e pare 'o pazzariello d''e ccanzone!
Na sera fuje chiammato,
pe' na festa, sott'a nu balcone
ô vico Scassacocchi…
Primmo piano, 'ncopp'a nu lampione:
'a mana lle tremmaje
'sta serenata jéva a Margarita…
cu 'sta chitarra ccá,
tu mo che cante a fá?
pe' chi se vò' spassá?
'O chiámmano Giuvanne cu 'a chitarra…
pecché sape cantá tutt''e ccanzone.
'A cumitiva allèra e ll'emozione
'o fa cantá, chiagnenno, "Core 'ngrato"…
Pe' chistu pretendente ammartenato
mo cade nu biglietto appassiunato…
e s'arricorda, quanno da 'o balcone,
cadevano cucozze e 'nfamitá…
E canta po' Giuvanne cu 'a chitarra
cu 'a vocca amara e cu na funa 'nganna…
Na sera pe' Tuleto
n'ombra scura saglie 'a copp''e viche…
Giuvá' che ce vuó' fá?
'a vita è chesta ccá:
cucozze e 'nfamitá!
