(Pazzaglia e Modugno)
CANTA ORIGINAL: AURELIO FIERRO
Cu 'e libbre sott''o vraccio
e 'a camicetta a fiore blu,
vuò' fà 'a signurenella
'nnanz'â scola pure tu…
Te piglie 'a sigaretta
quann''accatte pe' papà,
te miette già 'o rrussetto
comme vide 'e fà a mammà…
Lazzarè!…
Ma Lazzarella comme si!?
tu a me mme piace sempe 'e cchiù,
e vengo apposta pe' t''o ddì,
vicino â scola d''o Gesù…
Tu invece mme rispunne: "Eggià,
io devo retta proprio a te…
Pe' me ll'ammore pò aspettà,
che n'aggi'a fà?…nun fa pe' me!…"
Ah, Lazzarella!
ventata 'e primmavera…
Quanno passe tutt''e mmatine,
già te spiecchie dint''e vvetrine,
sulo nu cumplimento te fa avvampà…
Ma Lazzarella comme si,
tu nun mme pienze proprio a me,
e ride pe' mm''o ffà capì
ca perdo 'o tiempo appriess'a te!
Mo vène nu studente
'nnanz'â scola d''o Gesù,
te va sempe cchiù stretta
'a camicetta a fiore blu…
te piglie quatto schiaffe
tutt''e vvote ca papà,
te trova nu biglietto
ca te scrive chillu llà…
Lazzarè!…
Ma Lazzarella comme si,
ce sì caduta pure tu…
Ll'ammore nun te fa mangià
te fa suffrì, te fa penzà…
Na sera tu lle dice : "No"
ma si nu vaso te vò dà
faje segno 'e "sì", senza parlà…
Ah, Lazzarella,
'o tiempo comme vola:
Mo te truove tutt''e mmatine,
chino 'e lacreme stu cuscino…
Manco na cumpagnella te pò aiutà!
Ma Lazzarella comme sì!?
Te sì cagnata pure tu…
e te pripare a dì stu "Sì",
ma dint''a cchiesa d''o Gesù!